എടവക
ഗ്രാമ പഞ്ചായത്ത്

എടവക ഗ്രാമപഞ്ചായത്ത്

വയനാട് ജില്ലയിലെ മാനന്തവാടി താലൂക്കില്‍ മാനന്തവാടി ബ്ലോക്കിലാണ് എടവക ഗ്രാമപഞ്ചായത്ത് സ്ഥിതി ചെയ്യുന്നത്. നല്ലൂര്‍നാട്, എടവക എന്നീ വില്ലേജുകളിലായി വ്യാപിച്ചുകിടക്കുന്ന പഞ്ചായത്തിന് 47.26 ചതുരശ്ര കിലോമീറ്റര്‍ വിസ്തീര്‍ണ്ണമുണ്ട്. 19 വാര്‍ഡുകളുള്ള പഞ്ചായത്തിന്റെ അതിരുകള്‍ വടക്കുഭാഗത്ത് മാനന്തവാടി പുഴയും തവിഞ്ഞാല്‍, മാനന്തവാടി പഞ്ചായത്തുകളും, കിഴക്കുഭാഗത്ത് പനമരം പഞ്ചായത്തും, തെക്കുഭാഗത്ത് വെള്ളമുണ്ട പഞ്ചായത്തും, പടിഞ്ഞാറുഭാഗത്ത് തൊണ്ടര്‍നാട് പഞ്ചായത്തുമാണ്.

കുടിയേറ്റക്കാരുടെ കഠിനപ്രയത്നം ഒന്നുകൊണ്ടുമാത്രമാണ് പഞ്ചായത്ത് ഇന്ന് കാണുന്ന വികസനത്തിലേക്ക് എത്തിയിരിക്കുന്നത്. എടവക നിവാസികള്‍ക്കെല്ലാം അഭിമാനകരമായ “എടവക നെല്‍വിത്ത്” കേരളത്തിലെ വയലേലകളുടെ റാണിയായി അറിയപ്പെടുന്നു.

ലോഗന്‍ സായിപ്പിന്റെ മലബാര്‍ മാനുവലില്‍ കുറ്റ്യാടി – പക്രന്തളം – മാനന്തവാടി റോഡിനെപ്പറ്റി പരാമര്‍ശമുണ്ട്. ഈ പാതയിലൂടെയാണ് ജനങ്ങള്‍ വയനാടന്‍ മണ്ണില്‍ എത്തി പാര്‍പ്പുറപ്പിച്ചത്.

ചരിത്രം

1500-കളില്‍ കണ്ണൂരിനടുത്തുള്ള ചൊവ്വ പ്രദേശത്ത് താമസിച്ചിരുന്ന ആഴ്വാഞ്ചേരി നമ്പ്യാന്‍മാര്‍ വയനാട്ടിലെത്തി എടവക ഗ്രാമത്തില്‍ താമസമാക്കി. അവര്‍ താമസിച്ച സ്ഥലത്തിന് “ചൊവ്വ” എന്ന പേരിടുകയും ചെയ്തു.

നെല്ലും പശുവും സുലഭമായിരുന്നതിനാല്‍ നാദാപുരം, കുറ്റ്യാടി തുടങ്ങിയ പ്രദേശങ്ങളില്‍ നിന്നുള്ള വ്യാപാരികള്‍ ഇവിടെ എത്തി കച്ചവടം നടത്തിയിരുന്നു. വെളിച്ചെണ്ണ, തേങ്ങ, പുകയില തുടങ്ങിയവ പകരമായി കൈമാറിയിരുന്നു.

ഇന്ത്യന്‍ ദേശീയ പ്രസ്ഥാനത്തില്‍ സജീവമായി പങ്കെടുത്ത നിരവധി പ്രമുഖര്‍ ഈ പ്രദേശത്തുകാരായിരുന്നു.

സാമൂഹ്യ-സാംസ്കാരിക ചരിത്രം

ഒരുകാലത്ത് വയനാട്ടില്‍ ജൈനമതസ്ഥര്‍ വ്യാപകമായി താമസിച്ചിരുന്നതിന് തെളിവുകളാണ് സുല്‍ത്താന്‍ ബത്തേരി, കല്‍പ്പറ്റ, കണിയാംപറ്റ തുടങ്ങിയ സ്ഥലങ്ങളിലെ ജൈനക്ഷേത്രങ്ങളും ജൈനകുടുംബങ്ങളും.

എടവക പഞ്ചായത്തിലെ പാണ്ടിക്കടവിനോട് ചേര്‍ന്ന പ്രദേശങ്ങളില്‍ ജൈനന്മാര്‍ താമസിച്ചിരുന്നതായി തെളിവുകളുണ്ട്. “തരകനങ്ങാടി” എന്നറിയപ്പെട്ടിരുന്ന പ്രദേശം ഇന്ന് വളരെ കുറച്ച് ജൈനകുടുംബങ്ങള്‍ മാത്രമുള്ള പ്രദേശമായി മാറിയിരിക്കുന്നു.

ഇവിടെ പുനരുദ്ധാരണം നടന്ന ഒരു ജൈനക്ഷേത്രവും നിലനില്‍ക്കുന്നു. ആയുര്‍വേദ വൈദ്യരംഗത്ത് പ്രശസ്തരായ വൈദ്യന്മാരും ഇവിടെ പ്രവര്‍ത്തിച്ചിരുന്നു.

പള്ളിക്കല്‍ അങ്ങാടിയുടെ ഉദ്ഭവവും ചരിത്രപരമാണ്. “പള്ളി” എന്ന പദം ആധ്യാത്മിക ഉപദേശം, വിദ്യാഭ്യാസം, രാജശാസനങ്ങള്‍ തുടങ്ങിയവ നല്‍കിയിരുന്ന സ്ഥലത്തെ സൂചിപ്പിക്കുന്നു.

കോട്ടയം രാജാക്കന്മാര്‍ വയനാട് കീഴടക്കുന്നതുവരെ ഇവിടെ സംസാരഭാഷ കന്നടയായിരുന്നു. ബേഡരാജാവിനെ തോല്‍പ്പിച്ചതിനെ തുടര്‍ന്ന് ജൈനന്മാരില്‍ പലരും കര്‍ണാടകത്തിലേക്ക് കുടിയേറി.

പള്ളിക്കലില്‍ താമസമാക്കിയ ആദ്യ മുസ്ലീം ശൈഖ് ശാഹുല്‍മുര്‍ത്തലയായിരുന്നു. രോഗബാധിതയായ പെണ്‍കുട്ടിയെ ചികിത്സിച്ച് സുഖപ്പെടുത്തിയതിന്റെ പ്രതിഫലമായി കല്ല്യാണത്തുംപള്ളി സ്ഥലം സമ്മാനിക്കപ്പെട്ടുവെന്നു വിശ്വസിക്കുന്നു.

1626-ല്‍ കല്ല്യാണത്തുപള്ളി നിര്‍മ്മാണം ആരംഭിച്ചു. ക്ഷേത്ര വാസ്തുശൈലിയിലായിരുന്നു നിര്‍മ്മാണം.

കോട്ടയം രാജാക്കന്മാരുടെ യോദ്ധാക്കളായ കുറിച്ച്യര്‍ പഴശ്ശിരാജാവിന്റെ പോരാട്ടങ്ങളില്‍ പ്രധാന പങ്കുവഹിച്ചു. എടച്ചന കുങ്കന്‍ പഴശ്ശിരാജാവിന്റെ പ്രധാന പടനായകന്മാരില്‍ ഒരാളായിരുന്നു.

തോണിച്ചാല്‍ തിറ കുറിച്ച്യരുടെ പുരാതന ഉത്സവമാണ്. പ്രകൃത്യാരാധനയാണ് ഇതിന്റെ പ്രധാന സവിശേഷത.

കുടിയേറ്റവും വികസനവും

1940-കളില്‍ പാലാ, മൂവാറ്റുപുഴ, കൂത്താട്ടുകുളം തുടങ്ങിയ മധ്യതിരുവിതാംകൂര്‍ പ്രദേശങ്ങളില്‍ നിന്നാണ് പ്രധാനമായും കുടിയേറ്റം ആരംഭിച്ചത്. രണ്ടാം ലോകമഹായുദ്ധത്തെ തുടര്‍ന്നുണ്ടായ ഭക്ഷ്യക്ഷാമം ഇതിന് കാരണമായി.

കൊടിയ തണുപ്പ്, പെരുമഴ, വന്യമൃഗങ്ങള്‍, മലമ്പനി തുടങ്ങിയ പ്രതിസന്ധികളെ അതിജീവിച്ചാണ് കുടിയേറ്റക്കാര്‍ ഇവിടെ ജീവിതം ആരംഭിച്ചത്.

കല്ലോടിയിലെ ആദ്യ കുടിയേറ്റക്കാരന്‍ വെട്ടിയാങ്കല്‍ മത്തായിയായിരുന്നു. അദ്ദേഹത്തിന്റെ നേതൃത്വത്തിലാണ് നിരവധി കുടുംബങ്ങള്‍ എടവകയിലേക്കും എടച്ചനദേശത്തേക്കും എത്തിയത്.

എടവകയുടെ കാര്‍ഷിക-സാമ്പത്തിക പുരോഗതിയില്‍ കുടിയേറ്റക്കാരുടെ പങ്ക് നിര്‍ണായകമാണ്.

കൃഷിയും വിദ്യാഭ്യാസവും

ആദ്യകാലത്ത് കപ്പ, നെല്ല്, തെരുവ എന്നിവയായിരുന്നു പ്രധാന കൃഷികള്‍. എടവക നെല്‍വിത്ത് അത്യുല്‍പാദന ശേഷിയുള്ളതും പ്രതിരോധശേഷിയുള്ളതുമായ വിത്തായി കൃഷിശാസ്ത്രജ്ഞര്‍ അംഗീകരിച്ചിട്ടുണ്ട്.

പഴയകാലത്ത് പള്ളിക്കലും പൈങ്ങാട്ടിരിയിലുമായി രണ്ട് എല്‍.പി. സ്കൂളുകള്‍ മാത്രമേ ഉണ്ടായിരുന്നുള്ളൂ. എന്നിരുന്നാലും വയനാട്ടിലെ ആദ്യ ഡോക്ടര്‍ ഈ പഞ്ചായത്തില്‍ നിന്നായിരുന്നു.

സ്ഥലനാമ ചരിത്രം

“എടവക” എന്ന പേര് പ്രദേശത്തെ മണ്ണിന്റെ സ്വഭാവത്തെ അടിസ്ഥാനമാക്കിയാണ് ലഭിച്ചത്. വളക്കൂറ് കൂടുതലോ കുറവോ അല്ലാത്ത ഇടത്തരം മണ്ണായതിനാല്‍ “എടവക” എന്ന പേര് രൂപപ്പെട്ടു.

തോണിയുടെ ആകൃതിയിലുള്ള ഭൂപ്രദേശമായതിനാല്‍ “തോണിച്ചാല്‍” എന്ന പേര് ലഭിച്ചു.

“കല്ലോടി” എന്ന സ്ഥലനാമത്തിന് പിന്നിലും രസകരമായ കഥയുണ്ട്. ചോരന്‍കുന്നിന് സമീപം കൊള്ളക്കാരെ ഭയന്ന് യാത്രക്കാര്‍ കല്ലുകളെടുത്ത് ഓടിപ്പോകുമായിരുന്നു. അങ്ങനെ “കല്ലെടുത്തോടുന്ന സ്ഥലം” പിന്നീട് “കല്ലോടി”യായി.

സായിപ്പന്‍മാര്‍ കല്ലുകൊണ്ട് വീടുണ്ടാക്കി താമസിച്ചിരുന്ന പ്രദേശം പിന്നീട് “കമ്മന” എന്ന പേരില്‍ അറിയപ്പെട്ടു.